Der wilde Alexander

24. Der wilde Alexander

1. Der meie ist komen gar wunneclîch (KLD 1.III)

1 Der meie ist komen gar wunneclîch
mit mangen bluomen wolgevar;
der walt ist niuwes loubes rîch,
des machet in der winter bar.
5 die vogel hoehent ir gesanc
in walde und ouwen überal;
dâ von sô wirt ir trûren kranc.
des doenet wol diu nahtegal
ir süezen schal.

2 Ich wil der lieben dienen gern;
des sol si mir getrûwen wol.
ir hulde mac ich niht enbern.
ir lîb ist reiner tugenden vol.
5 ir minne mich enzündet hât,
daz ich erkalte mange stunt,
dar nâch erglüeje ich an der stat
als ob ich brinn: daz tuot mir kunt
ir rôter munt.

3 Wol mich daz ich si sehen sol,
sist mînes herzen ôstertac.
got hât ir lîp gebildet wol,
so liljenschîn und balsemsmac.
5 mîn meien zît und heide glanz
ist sî, mîn spilnder sunnen brehen;
si treit der êren rôsenkranz;
des muoz ir al diu menge jehen
dies hânt gesehen.

4 Sî ist vil hôher êren rîch,
ir lop daz vert gar âne meil,
ir blüendiu jugent ist wunneclîch,
an ir lît aller saelden teil.
5 ir mündel brinnet alse ein gluot,
ir wengel diu sint rôsevar;
vor missewende ist sî behuot,
ir lîb ist alles valsches bar
und dâ bî klâr.

5 Wol mich ir schoene und ouch ir zuht,
wol mich ir spilnden ougen brehen,
wol mich der reinen süezen vruht,
wol mich daz ich sî an sol sehen,
5 wol mich der reinen süezen klâr,
wol mich ir tugende manicvalt,
wol mich ir wengel wolgevar.
ir jugent blüet alsam ein walt
gar wolgestalt.