Christian

von Luppin

26. Christian von Luppin

1. Sie reine, sie vil schoene herzeliebe guote (KLD 31.III)

1 Sie reine, sie vil schoene herzeliebe guote,
si saelig wîp
alleine wont gewalteclîche in mînem muote.
ir lieber lîp
5 muoz mir doch iemer mê der liepste sîn.
sô rôt wart nie noch enwirdet niemer
als ir vil trûtez mündelîn.

2 Ir lachen, ir gelaeze, ir liehten ougen blicke,
ir werder gruoz
kan machen, daz vor fröiden in dem lîbe erschricke
mîn sêle muoz.
5 daz habe ein ende: selkes wart nie nicht.
durch got secht an ir kele, ir weichen hende,
die wîzer sint dann ichtes icht.

3 Ich wolde ir gevangen sîn gern unverdrozzen,
sô daz sie mich
dort solde in ir blanken arme haben geslozzen,
niemèr könd ich
5 mîn leit gerechen an der trûten baz.
ir mündel kuste ich unde wolde sprechen
'sich, dîner roete habe dir daz'.