Hohes Lied

'MINNELIEDER'

(36.) Hohe Lied-'MINNELIEDER'

Hie nach stavt Cantica canticorum. (Historienbibel)
bzw. 
Dis sint Salomons gedihte von der heydin wegen

Cap. 5. Dilectus meus.

Min fridel glügt in der glügenden rôt
Und rötet in wernder rôt,
Vor mengen tusent usserwölt
Sin hopt für edel gold gezölt.
5 Min lieb sind gar in liehter prait
Recht als die palm in söllicher haid.
Schwartz als ain rapp ist sîn knock
Getreid ist sines haures lock.

Cap. 7. In Sunamite.

Nuon brüffend waz Sunamitits sy.
Daz betüt man hie by
Das ist gesprochen senfft allain
So ist min süß min claur min rain.
5 Nuon sechend was brüffend ir an ir
Daz sond ir bewisen mir.
Wir sechend wan der burg tôr
Und der hochen vesti tôr.
Ach wie schön ist din gang
10 In dem geschüch âne wank
Der hüfften fält stond dir schon
Du fúrsten tochter von Syon
Die als die fúrspan sind gestalt
Gesmeid von hohes smydes gewalt
15 Darzu min liebe wolgestalt
Ir tugent it keusch ist männigvalt.

Cap. 5. Quo abiit dic michi.

Wa ist min lieb gegangen in
Das bitt ich dich zaig mir dahin.
Du allerschönst ain schönes wib
Vor aller zierd ist geziert din lib.
5 Sag mir wa ist er hingegân
Din fridel und din brutigam
Daz wir in suochent mit dir
Fröwe da findent wir in schier.
Min lieb gegangen ist aldâr
10 In dem süssen lufft fürwâr
Das er balsamlilgen vil
Brechen mag was er der wil.
In demselben garten
Beid sond wir sin warten.

Cap. 4. Quam pulcra es amica mea.

Ach wie schön wie zart du bist
Wol gezierd in aller frist.
Din gestalt der palm ist gelich,
Die brust der wintrub sunderlich.
5 Als ain Carmel ist din hovpt,
Din hals ist zesamengeclovbt
Als ain turn von helffenbain;
Sich, das bist du, frowe rain.
Kum zuo mir, vil liebe min,
10 Und gang uff den acker fin
Und wartend wie die pluomen brechend.
Der öpffel frucht wir sechent.
Lieb, da gib ich dir min brust
Gar nach mins hertzens lust.

Cap. 6. Ista est speciosa inter filias.

Die ist die aller schönste min
Die in der welt mag gesin,
Ir tochtran von Yerusalem,
Ich wen daz ir kainer zem.
5 Sy sechent die tochtran von Syon
Und hieltentz für hailig schon
Und ir antlit claur und fin
Lobtent all die kunigin.

Cap. 4. Tota pulcra es amica mea.

Schön bist du alszuomal
Liebes lieb ân zal.
An mail bist du gar,
Din leffz ist ein súß honig fürwâr.
5 Honig und milch uss der zungen
Endlich ist entsprungen
Und dines süssen balsams smack
Niement wol volachten mag.
Der wintter scharpff und der regen
10 Die sind zemal gelegen.
Die turteltub ist gehört
In dem lande hie und dört.
Die bluomen gebent liechten schin
Und die truben geben win.
15 Kum min lieb von Libano,
Das wir beide werdent fro.
Kum dar, so wirst du gekrönent
Und vor allen mägden geschönet.

Cap. 6. Pulcra es.

Schön bist du raine frucht,
An dir lit der werlte zucht,
Senfft gar und darzuo schön,
Die ich vor allen mägden krön;
5 Vorchtig als Yerusalem,
Als der purgveste und genem.
Frow du, ker dich zuo mir
In der wâren minne gir.
Din zarten lock und din hâr
10 Wellend mich lassen vil gar.
Die sind als die gaißherd
Und gewachsen wurden vert.
Din zen sind wys als der schnee
Und als die schauff gewyst ee,
15 Die da kumet von Galaat;
Sunst verst du in riche pfad.

Cap. 2 und 4. Ista est speciosa.

Die ist schön, zart, die genem
Ist ir niement wider zem.
Wie er gesechen haut die hend,
Die sind auripigment.
5 Und der minn bist du vol,
Wol im, dem sy werden sol.

Cap. 2 Dilecta mea loquitur.

Min liebes lieb so zuo mir spricht,
Dem ich volge mit der slicht;
Stand bald uff und yl zuo mir
Ungemailet und zier,
5 Die wingarten plügend sind.
Dô fröwet sich der minne kint,
Und der turteltuben gesang
Vest durch mine ore clang.
Kum dahin, das bitt ich dich,
10 Wilt du frölich finden mich.

Cap. 4 Vulnerasti cor meum.

Min hertz, min sel hâst du verwundt
Gar tieff in mines hertzen grund,
Zarte min schwester und min brut,
Des clag ich dir úberlut.
5 Noch me haust du mich verwundt,
Das sy dinem hertzen kund,
Mit dem hâr des halses din
Und einem hâr der ougen din:
Kum zuo mir in Lybano
10 Kum du wirst gekrönet do.

Eya wie schön, min lieb, du bist,
Zart und schön in aller frist.
Aller schön ain úberschön
Dich vor allen liep ich krön.
5 Din ougen clâr und balt
Als der tuben sind gestalt.

Cap. 2. Sicut lilium inter spinas.

Als ain gilg in den dornen
Bist du hinden und vornen
Wolbehuot ân mayl,
Wan du fúrst der sälde tail.
5 Rain vol allen mägten clâr
Bist du frow daz ist wâr.

Cap. 4. Favus distillans.

Du bist ain triffender honigsaim,
Din lebs haben den haim.
Ich main dich, vil reine prût,
Min liebes lib, mins hertzens trut,
5 Dins gewandes süsser smack
Mirr und wyrovch stete plag.

Cap. 4. Emissiones.

Min uslauß ist ain paradis,
Liebes lieb klug und wys.
Von der süssen öpffel schmack,
Die din wirdi volbringen mag,
5 Und der rouch von dinem gewand
Der ist uns ain tail bekant.
Und wyrovch und mirren gar
Verst du, frowe schön und clâr.

Cap. 5. Favum comedi.

Ich hân geessen min seim
Und mins süssen honiges saim
Und getrunken min win,
Der was recht so vin,
5 [Ich hân gevestent ovch min minn,
Der ög ich gar lang inn]
Und ovch min balsam schmack
Von aromata, der ich pflag.