Wachsmut

von Mülnhausen

18. Wachsmut von Mülnhausen

1. Wâ gesâhen mannes ougen (KLD 61.III)

1 Wâ gesâhen mannes ougen
ie zwei wengel baz gestân?
liljen wîz gar âne lougen,
wunneclîchen wol getân.
5 si treit lanc gelvarwez hâr:
waer daz rîche mîn und ir,
desn gunde ich nieman baz für wâr.

2 Ein kus von mîner frouwen munde
brennet sanfter danne ein gluot.
swem si des mit willen gunde,
der waer iemer hôhgemuot.
5 helfet alle wünschen des
daz ir küssen werde mir:
sô wünsche ich aber eteswes.

2. Si treit krûs hâr, krisp unde gel (KLD 61.I)

1 Si treit krûs hâr, krisp unde gel,
si treit ein unvertwelten lîp,
si treit ein klâr snêwîze kel.
al diu werlt hât niht schôner wîp.
5 mir waere ê liep bî ir ze sîne
dann bî gote in paradîs:
got herre, machet mich ir minne wîs.

2 Diu sunne schînet nie sô klâr,
mîn liep schînt dannoch schôner baz;
ir ougen stânt vil offenbar,
got an ir nie niht vergaz.
5 in naeme niht die krôn von Rôme
ze tragen für mîner frouwen lîp:
sô rehte wol behaget mir daz wîp.