Hiltbolt

von Schwangau

11. Hiltbolt von Schwangau

1. Ich wil aber der lieben singen (KLD 24.X[IV])

1 Ich wil aber der lieben singen,
der ich ie mit triuwen sanc,
ûf genâde und ûf gedingen,
daz mîn trûren werde kranc.
5 bî der ich alsô schône
an eime tanze gie,
ir zaeme wol diu krône:
sô schoene wîp wart nie.
Elle und Else tanzent wol,
10 des man in beiden danken sol.

2 In gesach sô tugentrîche
frouwen nie, des muoz ich jehen,
noch sô rehte minneclîche,
swaz ich frouwen hân gesehen;
5 des ist si vor in allen
gewaltic iemer mîn.
si muoz mir wol gevallen,
si süezer saelden schrîn.
Elle und Else tanzent wol,
10 des man in beiden danken sol.

3 Saelic sî diu süeze reine,
saelic sî ir rôter munt,
saelic sî die ich dâ meine,
saelic sî sô süezer funt;
5 saelic sî diu süeze stunde,
saelic sî daz ichs ersach,
saelic sî dô sî mich bunde:
diu bant ich noch nie zerbrach.
Elle und Else tanzent wol,
10 des man in beiden danken sol.